PROIEKTUA

PETRONORen ardura da eragiketa-estrategiak zehaztea, balio-kateak eraginkortasun energetikoko ratio handiekin jardun dezan eta, aldi berean, behar diren hornidura-denborei dagokienez eraginkortasun-estandar altuetan jardun ahal izan dezan. Algoritmia ere garatuko du, IA aplikazioekin eta 24 orduko eskari-iragarpenetarako zenbakizko elkarrekintzekin. Gainera, eragiketa-aplikazioak inplementatuko ditu, gertatzen diren aldaketak ordutegi-eragiketara egokitzen dituen denbora errealaren logikarekin.

ALBAk hidrogenoaren ekoizpena monitorizatzeko prozesuen ikerketan eta ekoizpena optimizatzeko zerbitzuen analisian parte hartuko du, aldez aurreztik ezarritako plangintzaren arabera.

CSPk ikerketa, garapena eta xehetasunezko ingeniaritza egingo ditu, RTG (Rubber Tyred Gantry) gurpil pneumatikoen gaineko portiko-garabia eraberritzeko. Garabi horrek manipulazioa egiten du CSPren Bilboko Portuko terminaleko edukiontzi-patioan. Azterlanak zehaztuko du ea gaur egun Generador-Diesel taldeak elikatzen duen RTGa hidrogeno-erregai-pilaren bidez propultsatu daitekeen, segurtasun-berme guztiak, lan-prestazio berak eta autonomia zainduz.

FERROk hidrogenoan oinarritutako propultsio-sistemak ikertuko ditu portu-esparruetan salgaiak manipulatzen dituzten garabietarako. Horrez gain, ingeniaritza mekanikoaren oinarrizko planoak eta xehetasun-planoak, ezarpenari eusteko elementu eta egituren antolaketa eta egituraren inguruko kalkuluak garatuko ditu, baita elektrizitatearen arloko oinarrizko eta xehetasunezko planoak, PLC programazioa eta diagrama eta kalkulu elektrikoak ere.

ENVASESek H2 erabiltzearen bideragarritasun industrialaren analisia egingo du, egungo gas naturalaren (GN) ordez aluminiozko ontziak ekoizteko lerroetan. Kontsumo-puntuetan gaur egun GNk duen eskaria zehatz-mehatz aztertuko du, eskari-profil horiek ulertzeko eta optimizatzeko H2 kasuan (baliabide mugatua), eta egungo instalazioen bideragarritasuna aztertuko du H2 sistemarekin erabiltzeko.

IBILek IoT plataforma baten diseinua egingo du hidrogenoaren kontsumoak monitorizatzeko, eta horrekin batera, haren banaketa eta dispentsazioari lotutako logistika optimizatuko du, garapen horiek Abanto-Zierbenako Hidrogenoaren Zentro Logistikoan aplikatzera bideratuz.

NORTEGAS arduratuko da mintz aurreratuak diseinatu, garatu eta testatzeaz, H2a gehienez % 2ko kontzentrazioan duen CH4 korrontea kostu lehiakorrean lortzeko asmoz, eta horretarako, H2a % 5-20an duen H2-CH4 elikatze-nahasketa bat hartuko du abiapuntutzat.

PQCk I+Ga aplikatuko du prozesu bat ad hoc kontzeptualizatzeko, erabilgarritasun handiko Data Centerren eraikuntza exijentzia-maila eta eskakizun tekniko eta funtzional berberekin diseinatu eta koordinatu ahal izateko, baina hidrogeno berdez elikatuta.

SARRALLEk elektrolizagailu konpaktu eta eramangarriaren bidez hidrogenoa hornitzeko diseinu kontzeptuala egingo du, elektrolisi-stack-en mota, kopuru eta potentziaren arabera, horietarako behar den lantegiko balantzea barne. Era berean, H2aren erabilera Tubos Reunidos eta Envases Álava enpresen instalazioetako beroketa-ekipoetan integratzeko azterlana egingo du.

TEAM INGENIERÍAk arriskuen baterako ebaluazio eta kudeaketarako tresnak garatuko ditu, H2an oinarritutako industria-sistemen diseinuan segurtasuna/inbertsioa ratioa optimizatu ahal izateko. Horretarako, hasieran arrisku anitzeko hurbilketa globala egitea aurreikusi da, H2SAFEY kontzeptua definituz (segurtasuna/inbertsioa ratio optimoa duena), eta ondoren, proiektuan bildutako aplikazioei zuzendutako berariazko garapen algoritmikoak gauzatuko dira.